L-Akkademja tal-Malti qed tfakkar id-90 sena mit-twaqqif tagħha (1920-2010).
L-Għaqda tal-Kittieba tal-Malti twaqqfet fl-1920 bil-ħidma ta' Ġużè Muscat Azzopardi, Franġisku Saverju Caruana, Dun Karm Psaila, Ninu Cremona u xi oħrajn.
L-għanijiet tal-Għaqda kienu t-tixrid tal-ilsien u tal-letteratura Maltija kif ukoll it-tiswir ta' ortografija standard. Fl-1964, wara bidla statutorja, l-Għaqda bidlet isimha u saret l-Akkademja tal-Malti, kif għadha magħrufa sal-lum.
Illum, l-għan ewlieni tal-Akkademja tal-Malti huwa li ġġib 'il quddiem l-istudju akkademiku fuq il-lingwa u l-letteratura Maltija. L-għanijiet l-oħra tagħha huma li tħares il-jeddijiet tal-ilsien Malti bħala l-lingwa nazzjonali u uffiċjali tar-Repubblika ta’ Malta, li toħloq kuxjenza favur l-użu effettiv tal-Malti fl-oqsma kollha tal-ħajja u li tibni kuntatt ma' ħbieb tal-Malti u ma' persuni li jużaw il-Malti barra minn Malta.
Dan tagħmlu id f’id mal-Kunsill Nazzjonali tal-Ilsien Malti, li hu l-korp awtoritarju nazzjonali tal-Gvern fuq il-lingwa Maltija, fit-twettiq tal-politika lingwistika tiegħu għal pajjiżna, kif definit fl-Att dwar l-Ilsien Malti.
STEDINA
Il-Kunsill Lokali ta’ Ħal Safi
flimkien mal-Akkademja tal-Malti u VersAgħtini IKM
jippreżentaw
Tifkiriet ta’ Lulju
sabiex infakkru lill-awturi
Ġorġ Zammit, Alfons Maria Galea u Dwardu Cachia
f’għeluq l-anniversarju ta’ mewthom.
Bis-sehem tal-kantawturi Walter Micallef u Rita Pace.
Nhar l-Erbgħa li ġej, 28 ta’ Lulju 2010
fi Ġnien it-13 t’April, Ħal Safi.
Nibdew fis-7:00pm.
Kulħadd mistieden u d-dħul b'xejn.
